當晚係星期一，所以比較少人，只有三台客，所以環境好安靜舒適。
最貼心嘅係餐牌有分女仔版本同男士版本、男士版本係有價錢嘅。
我哋叫咗最基本嘅8 course，每道菜職員都會詳細介紹，但係因為太專業，有D內容唔係好記得🤣
第一道菜係北海道元貝配魚子，元貝本身好新鮮，入口即溶，配合埋綠色嘅醬汁，好fresh，好開胃。
第二道菜一開始係焗住嘅，一打開好似仙境送過嚟嘅食物咁，視覺享受一流。白色嘅係醬汁，上面有酸味味嘅提子，又係好開胃。
然後係我好期待嘅法式龍蝦湯，味道非常濃郁，而且好creamy，正！男朋友覺得份量唔夠，我就覺得啱啱好。
然後係香煎法國鵝肝，鵝肝表面煎得稍脆，但入口即溶。
之後係黑松露配有機溫泉蛋，黑松露一片片上，好dum本啊！黑松露嘅香味同溫泉蛋異常地夾。
然後嚟一個芭樂學葩，係紅石榴味，酸酸甜甜，可以中和一下頭先口腔入面殘留嘅味道。
然後我嘅主菜係魚，魚好嫩滑，最美味嘅係魚湯，好濃郁鮮甜，係呢道菜嘅精華。
最後食埋甜品，飲埋餐茶用食埋朱古力，就捧住個肚走人了。
雖然埋單嘅時候有D肉痛，但係呢餐飯食咗差唔多三個鐘，職員一路都服務態度好好，食物質素又高，值得嘅！
