羲和小館 (已改名) 查看

今日同屋企去咗東涌站上面嘅商場食晚飯，食咗呢一間片皮鴨中菜館。我哋揀咗幾款菜黎試。入到去先發現而家做緊周年優惠，片皮鴨八折，同埋每一日有唔同菜式有七折。馳名烤鴨啲皮脆啲肉嫩啲，完全冇乾柴嘅感覺。師傅仲要喺你面前幫你片，所以啲鴨仲係脆卜卜。最特色嘅嘢係佢有自製芥辣醬汁，唔係平時嗰種芥辣。嗰種味比較淡同甜加少少芥辣嘅味道。師傅同我哋介紹鴨嘅三個部位都用不同嘅食法。有啲就加山楂同藍莓醬，有啲就加傳統嘅醬汁，最後就係佢嗰隻自製芥末。 特色之餘都真係幾好食。 濃湯酸菜魚湯汁濃郁酸辣，魚肉鮮嫩，完全吸收咗湯汁嘅風味，裏面仲有好多芽菜，紅薯粉同埋萵筍。吸晒啲酸辣湯味，酸辣魚來講佢呢度唔會好辣，不過麻味比較重。建議食咗其他菜式先，如果唔係就會琴左陣味。金銀蛋浸萵筍呢個菜式喺出邊冇咩見到，萵筍爽脆，配合完金銀蛋又幾特別。有咬口之餘個味道有層次。薑汁紅棗小桃膠薑汁少少辛辣加紅棗甜甜地，小桃膠Q彈，而且有好多桃膠。食完都感覺到好補，女性啱晒。又驅寒又健康嘅甜品。總括黎講，呢間餐廳食物幾好食，服務周到親切，環境都好舒服，價錢做緊特價亦都合理。下次再黎一定會繼續試其他菜式。