地點：灣仔利東街
菜式：日式燒肉放題
餐牌：放題做6組價錢，100分鐘就有4組價錢，我哋揀左100分鐘最平嘅人氣好評特選放題，6點前入座$258一位，另收加一。
7
呢個餐聲稱包48款野食，
牛一款
牛五花（跟四款醬汁）：口感味道唔錯，夠嫩口，不過太肥啦，要剪左肥膏先可以食多幾次。試左燒肉汁同炭燒醬，味道都差唔多，不過都好味。辛味醬汁都好惹味。
豚肉4款
厚切日本熊本豚腩肉：算厚切，唔算太肥，肉嫰多汁
日本熊本豚肉眼：好大塊，好多肉食，可以燒到少少燶面，不過無醬汁揀，肉較乾身，食左兩塊就夠皮
豚肉燒：無寫日本貨色即係大陸貨色？無試啦
豬頸肉：細細段，當然肥，所以爽脆
雞肉兩款
雞腿肉
雞翼：正常
王樣Premium有2款
日本熊本豚腩肉：同普通非王樣好似無分別
蜜糖香腸
內臟
大腸
新潟雞腎：好爽口
新潟雞肝：係味噌味道，質感正常
海鮮有多春魚同青口
青口連殼，正常貨色
其他食品有:
枝豆：麻麻地，本身無味。
蒜片
麻油燒蒜粒
牛油金菇：好香牛油味
迷你甜薯
麻香椰菜
味噌膳良豬青瓜
牛油本菇：菇仔好滑
燒菠蘿
牛油粟米
芝士粟米：粟米好甜，不過芝士太少
炸芝士圈
七味炸雞翼
波菜芝士薯餅
日式章魚燒：整得好專業，熱辣辣，外脆內滑又有章魚粒
炸雞軟骨：就麻麻地，皮太厚
香蔥拉麵
明太子冷烏冬
以上食物自己用手機落單，上菜都算快，有時要等。
仲有其他野食就自己攞。自助區喺一樓入口附近。
前菜變左自己夾，有鹽漬青瓜，泡菜，醋漬番茄，青瓜蜆肉，賣相麻麻，質素可以，偏重口味。
沙律有兩款，用玻璃瓶裝好，分別係牛油果沙律同野菜絲沙律。牛油果好新鮮。兩款沙律醬喺隔離自己加。仲有生菜包燒肉食。
有自製牛角飯，好多紫菜絲。
有關東煮。包括有大根，鷄蛋，另外四款魚蛋類食物。
燒野菜有南瓜，雞脾菇，京蔥，粟米，翠玉瓜，用蓋蓋住。仲有刈包。
有沖繩塔可肉醬同牛肉野菜咖哩可以撈飯食，我見有好多肉食。
湯有兩款，包括牛肉昆布湯同韓式辛味牛肉湯。
最後仲有甜品。
首先最緊要係有軟雪糕機，4款口味有意大利朱古力雪糕，白葡萄雪芭，阿薩姆紅茶，忌廉檸檬。
意大利朱古力雪糕正常；
白葡萄雪芭麻麻地，偏甜；
阿薩姆紅茶好滑；
忌廉檸檬酸酸地好食，我覺得呢款最好食。
仲可以扭紋。有兩款窩夫餅脆筒俾你自己攞，塊餅又薄又脆，好正。
雪糕隔離有奇異果醬，士多啤梨醬，焦糖醬。仲有棉花糖，熊仔果汁軟糖，迷你麻糬，石頭朱古力同迷你朱古力豆俾你加落雪糕度。
雪櫃有4款口味迷你雪米糍，係維記，有芒果，香芋，芝麻同雲呢拿。
甜品櫃由上至下有一款口味慕斯杯同布甸杯，窩夫，長崎蜂蜜蛋糕，雜果，朱古力大福，同泡芙。
兩個汽水機各有5/6款口味飲品。果汁有巨峰提子，菠蘿，雪梨，柑橙。另一面果汁機有檸檬，芒果，蘋果，雜果賓治。芒果汁好水。Coke zero有原味同橙味。
亦有咖啡機。
總括而言，100分鐘剛剛好夠食飽。呢個最平既餐查實最好食係得牛五花，其他野食無特別，只係正正常常。其他自助放題野食就主要係有多款軟雪糕可以清清味蕾，平時去牛角散叫會貴d，不過質素好過呢d肉囉，睇你想食質定量。服務座位正常啦，今日唔係特別差，準時提你交枱。
