牛角次男坊 (荃灣廣場) (已結業)

本身好鍾意食牛角燒烤，不過價錢有啲貴，知道牛角次男坊係牛角兄弟店，相信佢嘅烤肉質素應該唔差，所以去試吓！見到廣告相上面嘅「牛角次男坊丼定食」牛肉堆到好似山咁高好吸引，決定試吓，確實冇令我失望。即烤牛肉用咗牛角燒肉汁調味，牛肉選用美國草飼牛腹腩，烤到少少焦香但肉質仍然軟嫩，香口惹味，配埋珍珠米飯，非常飽足。另外試咗「櫻花蝦生姜豚丼定食」，豚肉選用西班牙豚腩肉，比燒牛肉厚身，咬落爽而不膩，伴埋櫻花蝦及溫泉蛋一齊食，味道幾豐富，不過我就覺得燒牛丼更加好食！跟餐有前菜及支裝解茶，配解茶真唔錯，食咗咁多燒肉可以幫助減輕下油脂攝取。