濟州燒肉食堂

營業中

休息中

如果住喺港島區嘅朋友一定知道，北角滙呢一間商場開咗一段時間入邊除咗好多嘢買之外，餐廳都各有特色。呢一間韓式餐廳我自己都食過幾次，每次同朋友想食韓燒嘅時候就一定會諗起呢一間餐廳，佢仲要係對住海景，環境一流。首先就算你未點任何嘢食，各款前菜都已經放咗喺你面前仲可以任添，而且爐邊蛋同粟米芝士都可以refill一次，食前菜都已經夠晒正！首先講吓佢嘅黑毛豬五花腩，一大條咁燒，由於啲脂肪比例都幾多，所以會燒到好大火，但係燒完之後食落口係好香口，夾住生菜一齊食真係好正。以佢嘅韓牛拼盤價錢來講都幾抵食，個人認為佢嘅牛舌即使唔係好厚身，但係食落口都好爽口。就算未燒之前都見到佢牛肉嘅質素唔錯。佢嘅芝士生蠔真係必點，每隻生蠔都大大隻，而且仲要好有海水味，落埋啲芝士一齊燒，非常邪惡。人蔘雞湯冬天飲嘅時候，成個人都會好暖，佢嘅雞湯充滿人蔘味，而且佢隻雞肉質好滑身，入面亦都有啲糯米，呢款人蔘雞湯都整得幾正宗。