韓正屋韓國料理 (搵食市集)

又去搵食市集搵食，今日先發覺原來呢個市集有兩層，樓上仲有火鍋等等嘅美食，往後可以慢慢逐間試。

食材擺放井井有條。

$48

上次猴子試咗日式便當，今次就試吓韓國食品，喺韓正屋叫咗個韓式牛肉便當（加HK$3有汽水）。一個紅色餐盒，分別載住牛肉、漬物、泡菜同白飯，擺放得整整齊齊，觀感唔錯。

牛肉份量充足。

$48

牛肉嘅份量相當足夠，成座小山丘咁，雖然裡面有啲菠菜，不過係調味必需嘅，唔係要嚟墊底呃秤。牛肉食起上嚟肉汁夠，唔會乾噌噌，而且味道濃郁最啱餸飯。

漬物唔夠爽脆。

$48

漬物方面就冇預期中咁爽脆，尤其係芽菜，比較腍咗啲，不過味道係OK嘅，只係欠啲口感。泡菜方面，唔太辣，撈少少落啲飯度就可以更加開胃。白飯軟硬適中，亦係值得一讚。