潮丸 (已結業)

趁住老公呢晚去咗朋友的婚宴，我就要食自己啦~突然想食清 D，所以响呢個 Friday Night 行咗一陣街街，就去食個魚蛋粉醫吓肚。入到餐廳，有長枱也有自成一角的，都差不多坐滿了人，好不容易找到個角位，靜靜地食個麵。看看餐牌，有湯麵、撈麵、飯類、小食和飲品，選擇充足而又不會令我有選擇困難症。只要把心儀的食物於燙膠的餐牌上畫畫就可以了，非常方便和環保。潮州魚三鮮湯麵呢碗魚三鮮真的很讚，因為　魚旦、魚片頭、魚皮餃　都非常鮮味。魚旦非常彈牙，仲食到有些微軟軟地的魚骨响入面，但又唔會拮到咀的。魚片頭外爽內軟，而我最愛的一定係魚皮餃，因為個皮係薄到半透而又唔爛的，咬落入面的料是腍得來帶點黏黏的，超級正～而湯底是不可忽視的，因為是飲落無味精，完全不口乾。是日油菜呢日的菜係菜心，葉和莖的比例大約一半一半，鍾意食葉的我都覺得份量足夠。柚子蜜不但有柚子，仲加多片檸檬，酸酸甜甜，非常潤喉暖胃。