爆丼屋 (已搬遷) 新店位置

之前幾個月喺MegaBox都見到呢間準備開張嘅爆丼屋，一直都好期待，終於等到佢開業，於是就擇個吉日嚟幫襯。原來佢嘅丼飯有好多唔同款，除咗刺身飯之外，亦有燒牛肉丼，種類繁多。丼飯包括味噌湯，我哋揀選咗「四重火山盛丼」同埋「制覇！鵝肝海鮮盛丼」。味增湯入面都有好多材料，包括有牛柳粒、海帶、油揚等等，非常豐富。四重火山盛丼材料非常豐富，包括有鮮松葉蟹肉、三文魚籽、海膽、拖羅蓉，而拖羅蓉係用甜蝦、劍魚腩、帆立貝、紋甲魷魚同三文魚籽製成，口感一流！而制霸！鵝肝海鮮盛丼嘅材料就更加豐富，帆立貝嘅數量多到係圍住碗邊放滿一圈，另外仲有一大件鵝肝、海膽、三文魚籽同黑魚籽，材料非常新鮮，每一口都充滿驚喜！個人認為呢個性價比更加高！一直充滿期待嘅爆丼屋果然冇令我失望，因為每一啖都真係充斥住滿滿嘅刺身，食過之後真係大滿足！