奇香冰室 (已易手) 新餐廳

在小時，燴意粉其實是街頭巷尾的茶餐廳都做得不錯的基本食物。但時至今日，到處都係麵包舖、老麥及肥佬上校，好的燴意粉先變成了鳳毛麟角。去找老神父有事相求，搞掂後，一個人走在勝利道，由頭行到落尾，有不少食肆，但人也出奇地多。想起這裡的燴意粉，在門口見有位，就拿拿林坐低，叫了碟腿蛋燴意粉加杯鴦走少甜。檯檯都叫燴意粉，而廚房一碟碟的炒，所以都要等一等先有得食。意粉燴得色水對辦，煎雙蛋靚仔的舖在面頭，火腿交叉的舖在蛋旁，賣相絕對不馬虎。意粉軟硬恰好，用茄醬及鮮茄去炒，也是燴意的無敵方程式，夠味道又不太酸。雖然我隨時都少得出這碟意粉，但在出面茶餐廳都食到，是不容易的。這裡的燴意粉，是值得一試。鴛鴦味道不夠，茶味及啡味都稍遜。見佢水吧有一隻隻大隻厚身的新地杯，如果太座來，一定會叫個雪糕新地來嘆下。埋單37蚊，不算平，但有水準。當然是沒有專誠來吃的道理，講到尾都係碟普通的燴意粉而已。題外話：行過街口的熱狗店，竟然是有人排隊，真的配服時下飲食雜誌的影響力。見佢經營左十幾年，都未曾有如此「盛況」，說到尾，是間普通的熱狗店吧了。