黑門水產すいさん (棉登徑)

連放幾日假，食評癮起，於是寫番近排去過既餐廳；又睇番自己之前寫既食評，發現原來唔少好評既已經結業。。。所以食過好味既真係要食多幾次，黑門就係其中一間。去黑門食飯都有d機玄巧合，只係兩條友肚餓，去到棉登徑發現有位泊車，條街一排都係食店，間間都幾吸引，只係呢間最近車位。好彩無失望，入到店收銀姐姐好殷勤安排坐位。見到有人食燒海鮮，香氣四溢極吸引，令人食指大動。即刻先食海鮮—羅甲燒，又叫左帆立貝同蜆。羅甲燒好香，燒到殼都脆，好味。帆立貝都好，佢有特別既調味，唔錯。最欣賞係蜆，用酒燒本身都好香好夾，但d蜆仲有淡淡海水味，啖啖精華。然後叫左個刺身盛，量算多，但件件魚都係厚切，而且好新鮮，海膽香濃creamy，要慢慢嘆d刺身，簡直係享受，再加多個三文魚手卷，完美。另外仲有叫左雜菜天婦羅同炸蓮藕。同樣質素高，仲有我鍾意既秋葵；炸蓮藕好似薯片甘，好香口，但可能鹽花唔均勻，有幾塊略鹹。整體來講好滿意。呀仲有件趣事，店家好有愛，應該會按客人要求播生日歌切餅慶生，當晚食左兩個鐘有三枱，都幾好氣氛。