牛摩+ (新港城中心(5期)) (已結業)

收工特登入馬鞍山搵友人拎嘢，順便食下飯。行過新港城見到呢間日式火鍋，橫掂好耐無打過邊爐就入去食下。餐廳有個鍋燒放題，見價錢唔算貴就點咗嚟試試。首先伺應先端上鐵鍋，中間有兩粒牛脂肪粒，可以燒出油令食物無咁易燶同加重牛味。另外仲有秘製北海道燒肉味噌汁同埋特製骨膠原啫哩。味噌汁鹹鹹地帶少少辣，燒肉時塗上醬汁更加惹味。骨膠原啫哩一擺上鍋就即刻熔，令牛肉無咁易燒乾同更加juicy。我哋揀咗牛小排set，油脂分佈均勻，牛味都幾重。牛舌切得比較薄身好易燒，口感比較韌有嚼勁。豬肉口感軟嫩。雞肉燒得好香口，食落無雪味味道鹹鹹地好好食。海鮮拼盤有海蝦、墨魚仔同埋帆立貝。如果食夠燒肉，可以同伺應講轉涮涮鍋。我哋揀昆布鰹魚清湯同港式蕃茄牛肉湯，湯底出乎意料之外地濃味，真係真材實料。自助區有數十款配料選擇，除外仲有壽司、前菜、串燒同雪糕等好多種類。一餐滿足兩個願望，抵食！