聚興家

營業中

休息中

太子同深水埗一帶都真係可以話高手雲集，今次老友記帶隊去食好西就試咗呢一間位於太子地鐵站附近的小店，叫咗六樣野食，基本上樣樣都好好食，當中就以上湯澳洲龍蝦煎米粉底最出色。因為呢間餐廳有C區，所以可以多D人坐埋一枱，真開心，多D人可以試多D唔同款式嘅食物。我地都一齊推舉上湯澳洲龍蝦煎米粉底係最精彩最好食嘅，龍蝦新鮮唔洗講，反而個煎米粉底同埋佢個汁真係有驚喜，米粉本身就係普通野，不過要煎得夠薄夠脆真一D都唔容易，功夫同心機都要兼備，仲要加埋個汁之後唔會令個煎米粉即刻淋晒，又係一絕，而且個汁真係好好食，可以話係成碟餸嘅靈魂，真係無得輸。豆酥蟹又係一絕，印象中出面好少食到用豆酥煮嘅蟹，D豆酥本身就已經好香，當佢吸收埋D蟹嘅精華，淨係D豆酥都可以餸到兩碗飯。酸菜魚個湯底調得好好，味道適中，唔會搶走晒條魚嘅鮮味，條魚就固然新鮮啦，應該係用大條嘅桂花魚，魚肉好滑而且唔多骨，唔怪之得好多人都叫。豉椒炒蜆同生炒排骨都好食嘅，不過相比之前嗰幾樣野即刻比下去。