漁匠料理 (已結業)

Item: 漁匠料理
Rating: 4
Author: 奧志雷

Sakana Takumi

189 食評

味道

環境

服務

衛生

抵食

2518

上水

$101-200

日本菜壽司/刺身

153

奧志雷

等級4

2.1K

繼續獨落去，唔好比佢停，無邊無際日日月月年年 ﹗早場！早飲早醉早瞓覺，lunch time 叫支 sake 降降火先。想試嗰支又無晒，是但咩都好啦。嬲嬲豬美食治療！滿懷憧景既台南之旅被蔘粉教完全催毀，我真係要帶眼識人 ﹗

朋友仔話佢公司支助旅行好抵玩要請埋我，點知係蔘粉教傳銷技兩 ﹗我即刻自費買機票返香港啦，仲想我留多 4 日，您都痴筋架 ﹗無啦啦唔見七千蚊，一肚氣 ﹗我要食盡去，食好野減壓 ﹗

單挑漁匠，第一次幫襯，食個 lunch 先！漁匠行高檔路線喎，中上既價錢，仲有好多高價食材添，比大埔旭川更貴。估唔到舖仔細細可以提供咁多款料理，直頭係居食屋陣容，壽司、刺生、炸物、燒物、鍋物、拉麵、定食、甜品、啤酒、清酒、等等。侍應全部為嬸嬸們，服務大致滿意。環境不過不失，空氣流通，不過檯櫈都係細細張，無卡位提供。

蜆肉麵豉湯，即沖型，跟我係 759 買既同出一徹。蜆肉無味且韌，$15 合理，起碼個湯熱辣辣，味道滿意既。三文魚腩刺生，高質無得挑剔，魚脂豐富，純天然鮮魚甜香，滑滑溜溜無得頂 ﹗高檔刺生點解唔用即磨鮮山葵蓉呢？用粉開既貨色削削地喎，欠缺無清香帶甜鮮味。

海膽軍艦，鮮甜滑留 juicy 海膽沒半點腥味，高質而彈彈，跟爽甜青瓜及香脆紫菜味道非常相襯添！壽司飯難得令我滿意，飯粒飽滿不濕不爛。原來依度壽司係繼件叫架，仲好！可以試多幾款。

軟殼蟹天婦羅手卷，真天婦羅黎喎，唔係普通乾硬炸蟹扮加呢！即炸熱辣辣，外脆內軟，好鬼鬆化，蟹肉十分鮮味而突出，紫菜依然脆卜卜。炸漿可以再薄一點，炸到雲一樣就最 perfect 喇。蟹可以卷低一點，依家只有 3 份 1 食到蟹，可以做得更貼心。難得飯粒做得如此高質數，非常多壽司店既飯淡而無味、唔係太硬就太濕太爛、醋太多太嗆或帶澀。依度飯粒飽滿乾爽甜酸度剛好又清香，讚！

燒鰻魚，依次真係無叫錯您喇！我最憎硬乾、死實、無鮮味或瀰漫著翻熱味道既燒鰻魚 ﹗跟碳爐一齊上，睇住油脂慢慢加熱而跳動，吱吱作響，異常興奮。漁匠係我食過最好味，肉嫩肥美又多汁，皮脆肉滑又熱到出煙，必食！

珍寶活帶子刺生，非凡脫俗既甜美，即開即食那有得輸 ﹗滑溜溜，正到震！叉燒豬骨湯拉麵走蔥，燻蛋味特濃，糖心蛋黃甘甜無比，好好食。叉燒夠腍而肥美，不乾不硬又夠乾棉。即食拉麵麻麻地，算罷啦。豬骨湯即沖型，還可以。

石鯛活魚生，只係賣剩石鯛，都要照食架，陰功。魚味淡而質地偏腍，清清淡淡沾上 wasabi 都食得出鮮味，滿意。

大拖羅刺生，粉紅色可遇不可求，魚油魚脂超級潤滑而澎湃，甜美可口，食到唔停口。超甜超滑入口溶化，肥美致極，魚脂澎湃而細膩，抵您咁貴 $230 大元。可能我太早幫襯，依家先五點幾有排都未到晚市，所以未攤得夠、未解凍得透徹。睇個樣都知，溫度太過冰凍，仲有少少霜呢，唯有留一塊攤多陣再品嚐。良久，見塊大拖羅已完全解凍，放上舌尖隨即溶入味蕾之中，非凡濃縮魚脂香甜味道，比剛才更濃加濃厚，正到無淪 ﹗

油甘魚腩刺生，極品甜甜甜，紅色部份最甜，軟棉滑滑，好好味呀 ﹗活赤貝刺生，黏黏滑滑又帶爽，海鮮鮮甜到不得了。網燒牛扒，甜甜牛扒中規中矩，質感鬆軟有咬口，都幾好。

海鮮冷拉麵，我問可否轉稻庭烏冬，居唔唔可以囉 ﹗雪藏帆立貝及大蝦都完全無味道，只得雪水味道，胡麻蟹柳加 wasabi 好正，撈上即食拉麵無感覺，整碗撈麵毫無生氣，唔難食，倒晒落肚算。