紅辣椒 (已結業)

海鮮冬陰功湯，夠香夠酸又帶微辣，味道香濃，飲時好享受，好美味 ﹗但飲完有點渴，未必係味精，可能因為鹽份較重啦。明爐烏頭，上次發現有魚食，今次專登黎試一試。爐火好弱，等好耐都未滾得起呀，可能冷氣大風掛。等唔切，見暖暖地都照食。泰式肉碎汁仲未能滲入烏頭之中，所以魚肉味淡，但質感都算滑。過左十幾分鐘後，差不多食晒條魚，個湯終於滾喇，而魚肉亦開始有湯既酸甜肉汁味道，但太遲啦 ﹗泰式燒雞，未試過，又再以身試險喇 ﹗叫依款燒雞係出於好奇心。甜甜甜、肥肥肥、油油油 ﹗肉質都還好，嫩而有肉汁，我都係決定食返海南雞喇 ﹗香氣同賣相都算吸引，但味道真係麻麻呢，可能我本身都唔鍾意食甜，所以有點影響，不過肥同油就無辦法啦。馬拉盞炒椰菜苗，未試過咪叫黎試吓囉，食得炒通菜多，都想轉下。椰菜苗質感較硬，厚身亦較乾，質地粗糙又老，無咩水份，味道帶澀。個人不太喜歡，所以食幾啖就放棄喇。