新鮮鹽焗乳鴿雜拼盤 ($48)
乳鴿食得多，但乳鴿腎及肝就真係好少食喇，口感好彈牙爽脆，送酒一流，可惜我哋冇飲酒
香燒脆皮豆腐 ($32)
豆腐上鋪滿木魚，香味倍增，豆腐外脆內軟，好味
鹽燒雞中翼 ($28)
唔洗多講，我係雞翼怪，去到邊都要食！特別一讚係個皮燒得好脆，就算擺咗一陣先食，都仲非常辣口！
鹽燒鮮雞皮 ($28)
非常超級脆口，好似食緊薯片咁！我無食雞皮好耐，但呢個食起上嚟唔油膩，而且一啲肥膏都冇，仲帶有少少雞油嘅香氣，實在都忍唔住成串食晒
奇趣餡餅北京填鴨 ($68)
餡餅雖然薄薄哋，但煙韌濕潤；鴨肉好香口而且juicy，而且醬汁冇過鹹或過甜，有驚喜！
法式鮮蟹肉虎蝦烤多士 ($78)
多士激脆，真係要好小心食否則會整損個咀！兩隻完整虎蝦肉好爽口彈牙，不過蟹肉打得太碎了，加上千島醬蓋過咗蟹肉嘅鮮味，有啲美中不足
汁燒鮮蠔燒飯糰 ($68)
賣相好特別，燒飯糰上插咗兩件廣島蠔，雖然望落去細細粒但新鮮鮮甜。用咗自家製燒汁去燒嘅飯糰外層微焦，但入面煙韌，再用紫菜包住食，又脆又軟層次真豐富，有趣嘅食法！
清酒煮日本沙白 ($98)
落咗好多芫荽、芹菜等，所以一上菜已經覺得好香。來自日本嘅沙白夠晒大粒肉厚，鮮甜同埋最重要係無沙！清酒味道唔會好搶，飲起上嚟覺得好舒服，仲有陣陣嘅芫荽味道，超正！
凍柑桔話梅蜜 ($28)
以為會好甜，但味道偏酸，柑桔味道超濃，最底仲有一粒話梅，非常開胃
食物質素不錯，服務非常良好，價錢合理。原來呢度嘅海鮮仲係日日喺魚市場買嘅，最衰大口仔唔鍾意食海鮮，如果唔係就可以預訂海鮮食喇，下次真係要試試囉！
走嗰陣，睇到張紙寫住呢度每個月嘅第2及4個星期二會派飯盒俾長者及有需要人士，抵讚！
