Bistronomique Staunton (已結業)

成日去PMQ上堂都會經過蘇豪區,見到食肆林立,平時自己一個都唔會專登走入去食嘢,今日夜晚上完堂可以同朋友仔搜尋下附近有咩好嘢食.朋友仔想食西餐,經過呢一間見到氣氛都幾好,望吓餐牌見啲嘢都啱食,所以就入咗去啦!Babe Squid , 鮮番茄醬焗bb魷魚,魷魚好淋,番茄醬酸酸甜甜咁,入邊仲有啲辣肉腸,個面加左啲麵包糠焗脆咗,不自覺咁食完一件又一件! Soup de Possion,普羅旺斯魚湯, 叫咗一個share店員好貼心分開兩碗,個湯非常之濃郁,魚味唔算突出,反而蝦味非常之濃郁,用咗大量嘅海鮮同埋蔬菜去煮呢個湯,然後將材料打爛令佢變杰身,鍾意飲西湯嘅人呢一個係不二之選! 鹽焗原條海魚,伴蕃茄莎莎, 店員先將海鹽破開,然後請我哋先食魚嘅一邊之後佢會幫我地起骨就可以食埋另一邊,因為用鹽焗嘅關係,所以條魚本身已經有鹹味店員提醒係魚肚入面嘅海帶都可以一齊食, 想食另一個口味可以加埋番茄莎莎一齊食,我就覺得魚肉可以就咁食,因為已經夠鹹同埋都好滑,而海帶就可以配番茄莎莎一齊食,感覺都幾清新嘅! 條魚實在都幾大條下,兩個女仔食一條其實都已經唔使再食其他野啦