淂記 (已結業)

因為疫情關係，我哋一班舊同事聚會一拖再拖👉👈 呢晚難得成事，當然要食好啲啲🤭 本來我哋打算去食 #蠔 㗎，不過睇過啲食評似乎有啲伏，所以都係穩陣啲改去食 #中菜 😀 咁啱早排佢哋喺 #利園 試過 #淂記 嘅套餐，聽講評價都唔差，就一於去試吓啦！繞過兩條長樓梯，終於嚟到。餐廳地方都幾寬躺，不過人客唔多，而且光線比較淡，顯得有啲冷清😅 我哋照原定計劃，叫咗個 #蠔皇花菇鮑魚、#北京填鴨 套餐。整體嚟講，隨咗個 #菠蘿咕嚕蝦球，同埋 #帶子龍蝦湯 比較滿意之外，其他嘅餸菜、服務都麻麻地，尤其主角「北京填鴨」嘅鴨肉一啲味道都無，似烚過水再翻煮😅 而最特別嘅係 #前菜「鴨子四喜拼盤」，以為係用鴨肉做主題啦，點知原來係「紹興醉雞、酲醋小排骨、香煎素腐方、蔥油鴨胸伴茄子(點解我食唔到鴨胸嘅?)」😅 一班人約出嚟食飯，有美味嘅食物當然係bonus🥰 不過最重要嘅都係圍埋吹吓水、八吓大家嘅近況，大家開開心心過一晚先至係最重要呀❤️