炯記餐室 (沙咀道) (已改名) 查看

炯記二人餐就食得多，今次的起心肝試埋最出名的煙燻燒鵝，指定要多肉啲嘅下莊（指定上/下莊要加10蚊），我地三個人食，叫個例牌都食得非常滿足！148蚊皮光肉滑，真係好耐無食燒味食得咁滿足！皮脆不在話下，肉都相當厚實有鵝味，肥瘦適足，三個人食真係啱啱好，兩個人可能都要打包返屋企。主食方面要咗冬菇豬手撈麵（54）同胡椒豬肚雞米線（68）。炯記除咗燒味之外，豬手都燜得好淋又厚肉充滿骨膠原，所以味道黎講我地都鍾意豬手多過其他肉，畢竟咁好食嘅豬手唔係周圍有。胡椒豬肚雞米線好似係新野，我覺得胡椒味都重嘅，不過酸菜味更加重，其實呢個應該係酸菜胡椒豬肚雞米線先真，鍾意酸菜又想食野暖身嘅可以一試。