巴辣仔烤魚雞煲 (加連威老道) (已結業)

最近先知原來尖沙咀旺區開咗間食烤魚嘅餐廳！餐廳位於加連威老道近尖東位置，都好容易搵到。餐廳有兩層，7:30都已經差唔多全院滿座！睇埋餐牌就覺得食物款式多，有烤魚同雞煲，價錢唔會特別貴。自助區有醬料同生果選擇。原條烤江團魚$358，仲可以任選四款配菜免費: 海帶、腐竹、豆卜、薯仔。肉質鮮嫩唔難口，食落啖啖肉，唔算多骨，配埋小辣嘅湯汁，好惹味！另外配菜都係屬於索湯類，正！我哋仲叫咗其他配料。滑牛肉，份量都好多，兩個人未必食得晒。蜂巢豆腐，索湯一流！自家製紫菜響鈴卷，紫菜味好香，好少餐廳有紫菜響鈴卷，嚟到當然必點！響鈴卷大大件，夠晒飽肚！飲品方面最給正嘅係超大杯飲品，呢度有好多款特色飲品，雪燕、桃膠等都有得叫而且價錢仲好平。雪燕桂花紅茶，桂花味好香但係雪燕就唔係好食到。