Da dolce X Domon (已結業)

夜晚7點行完街落朗豪坊搵飯食, 行行下諗起蔡san話札幌拉麵係香港最好食既北海道拉麵店, 既然未幫襯過又唔駛等位, 於是就扯埋大少入去開飯。基本上d店員姐姐都係掛住傾偈, 傾傾下仲要同某男店員響度追打, 真係俾佢地嚇親! 烏蠅多到呢, 好恐怖, 趕極都趕唔完, 成餐飯對手都好唔得閒, 右手拎筷子, 左手就好似抽筋咁撥烏蠅!!! 至於野食其實都係一般, 我又唔覺得有蔡san講到咁好食。 牛油拉麵個麵加左塊牛油係香濃左好多, 不過麵身偏淋, 好似淥完放左好耐。 ANKAKE拉麵問店員姐姐即係咩拉麵, 佢話"個湯咸過其他拉麵囉......" 唔, 明白晒!!! 好濃既醬油味, 但係食多兩啖係會開始口渴, 食完簡直係渴死左。 炸雞軟骨去邊間日式餐廳都會叫炸雞軟骨, 同其他地方食到既冇咩分別。 鹽燒牛舌同個菜名一樣只係有鹽味, 至於牛舌本身既味道, 係冇既, 可能少人叫, 雪得太耐雪到冇晒味。 榛子雪糕咖啡咖啡很淡, 不過舊榛子雪糕好好食, 而且裡面仲有原粒榛子。