赤丸製麵所 (已結業)

(新工作業務繁忙，可幸終於有機會去還一還稿債。)新居入伙不久，有好多小傢具需要添置。九龍區除咗MEGABOX之外，德福亦係選擇之一。雖然呢個商場人流唔係咁旺，但係要輕鬆搵嘢食都唔係咁容易。再加上阿K想食日本嘢，選擇更加觸襟見肘。我地深入商場內部，發現呢間食店有人輪候，加上名字對我地嚟講係陌生咗啲，於是乎我地都願意花些少時間去等。餐廳設計特別，可能舖面面積細小嘅緣故，所以坐位比較細小，遇上有人出入嘅話都要互相遷就。我揀嘅係芝士牛肉烏冬。如圖所見，製作並唔係話好複雜。選用嘅牛肉能保持原有嘅肉味，以芝士入饌，有點創意，但「立痴痴」嘅感覺，配上烏冬，唔係個個人都可以接受。烏冬質地彈牙，唔會話「散修修」，相信如果我嗌冷烏冬嘅話，應該口感會更加好。價錢與一般日式食肆差唔多，埋單每人大約四十蚊。