拾悦咖啡 (已結業)

難得的一日返晏，其實好應該訓夠皮差下電，可惜年紀大訓唔到咁多，所以彈咗起身揾個brunch食吓。小巴落到火炭因天氣太熱唔想行入去啲工廠區就入咗去沙田商業中心。見到有間叫拾悦咖啡有靠落地玻璃窗嘅枱比我望吓就入咗去。初頭都諗住叫吓all day breakfast，不過見佢有冷麵set又想試吓所以叫咗個檸檬汁煙三文魚天使冷麵配美式咖啡。望住落地玻璃窗（雖然並唔係咩無敵靚景），背景音樂一直播緊我最愛聽嘅薛子謙 (簡單點說話的方式簡單點，遞進的情緒請省略，你又不是個演員，別設計那些情節 ) 個人完全盡入放空狀態，好舒服好relax。過咗一陣啲野食嚟喇，見到個冷麵都好靚好有食慾。我先唧咗啲檸檬汁落去然後食第一啖，感覺好清新，好適合夏天食呀，冷麵口感一流，有韌道得嚟又唔會淋係帶少少硬身嗰種再配合檸檬汁同底下嘅沙律菜，又好味又無罪惡感。我點嘅美式咖啡屬於較濃，啱哂我今晚又要開夜。我繼續放空咁慢慢食完嘆埋個咖啡之後電話聲響起我要返工嘅訊號喇，起身走嘅時候十分精神，仿佛已經訓咗好耐咁，有時個人差電未必一定係訓覺嘅，可以好優閒咁放空食一啲美味嘅食物都可以係為自己差差電嘅方法呢～