九記打冷.小菜.粉麵 (已結業)

每次放工經過這間九記潮州滷味店，見到佢門口掛住的一隻隻獅頭鵝就食指大動，今晚放工就同老公兩個人過去食個晚食。晚市有套餐都要幾十蚊起，亦有多款小食及滷味。鵝件(例牌)這裏最出名一定是獅頭鵝，連骨上的鵝肉比鵝片有咬口，可以食到滷水的味道滲入骨內，鵝肉既香又腍，下面則以滷水豆腐及花生墊底。凍烏頭餐牌上寫時價，問一問原來都是百多元，即刻叫了一條，烏頭肉質結實，未到冬季，黃油不算豐富，魚肉雪白，加上特製的黃豆醬，帶起魚肉鮮味。蠔仔粥每次食滷味一定會叫蠔仔粥，蠔肉粒粒脹卜卜，新鮮有蠔香，加上冬菜等味道，整體鮮味十足。