沛公甜品 (已結業)

早前因為看到沛公嘅班戟做團購而令我想到黎試下呢個招牌榴槤班戟(但係我冇買到團購而係以正價黎食..)，結果呢...好，先講講我點左啲乜先，「十大必吃」點左4樣，分別係榴槤千層班戟、芒果千層班戟、楊枝甘露同埋芒果椰汁黑糯米。楊枝甘露同芒果椰汁黑糯米水準一般，黑糯米略嫌太結，都係講番個主角千層班戟，好多層嘅班戟夾住滿滿嘅Cream，食落真係好guilty，榴槤味好濃，鐘意食榴槤嘅人一定唔會失望，芒果味道都好不過就冇咩驚喜，如果要揀一款黎試一定係揀榴槤！要講缺點就係千層班戟好似雪得唔夠凍，明明睇住佢喺雪櫃拎出黎都好似冇雪過咁，如果夠凍應該會好好多。除左芒果同榴槤味之外仲有好多味可以揀，有興趣嘅朋友可以試下，總括黎講千層班戟呢個甜品都幾有新鮮感，一試無妨，而千層班戟以外嘅甜品我就冇咩推薦啦。