金發麵包 (已結業)

上晝喺西九龍政府合署攞完野,，見行返返去地鐵站個時有啲口痕，想食個包，所以就入去睇吓佢有冇菠蘿包賣。我本人非常喜歡吃菠蘿包同幫襯啲唔係連鎖店嘅麵包舖，支持吓啲小店嘛🤗

入到去都幾乾淨企理, 啲包都排得好整齊，每格都有用蓋擒住，唔會比啲烏蠅蟲仔飛入去偷食🙂 我𥄫下𥄫下終於比我搵到我嘅至愛😘 諗住搵個盤同夾夾,但係唔係好知係邊，有善嘅店員哥哥仔就問我想要咩，我話要菠蘿包，咁佢就唔知係邊度變咗個夾，好快幫我夾左個，入咗落紙袋。我比完錢就攞咗走，即刻邊行邊食。。。

首先要讚下，我一咬落去啲皮冇甩晒出嚟係幾咁難得嘅事☺️有時連鎖店嘅麵包舖都會整到啲菠蘿包皮甩到一忽忽🙄第二就係佢入面唔係齋空氣或者好多好大嘅窿🙌🏻第三就係佢個菠蘿包有XX冰室嗰啲一樣咁大,但係價錢就係冰室價錢嘅一半，即係$4咋😱😱😱 轉過隔離街嗰間麵包舖都要$4.5🙂 我點解知？因為我都幫襯埋佢哋買咗個菠蘿包同墨西哥返屋企🤗

加多$4仲有菠蘿油添, 我就冇叫啦，不過下次有機會嘅一定會, 因為佢寫明係即整嘅😙

咁嘅價錢有咁嘅水準，真係令到我不得不寫呢個食評🥳我join咗OpenRice咁耐呢個都係我第二個食評, 亦都係我第一次寫咁多咁長嘅中文😀

我仲為咗save低個地址，專登行返轉頭check下個店名，喺呢度開咗個新List叫做Bakery🥐

不過有讚亦都有。。。改善嘅空間。個包係室溫溫度，其實唔係好大問題嘅，不過都可以諗下點保持住佢一新鮮出爐嘅暖溫度，同埋我見唔到有墨西哥包，好似得奶油墨西哥包，如果有傳統齋墨西哥包就好啦👍🏼

希望多啲人睇到我呢個食評會去幫襯下啦😊