鬼馬雙星 (已結業)

流連於天后，發現一間車仔麵店，名叫鬼馬雙星，門外還有一個花籃，相信是新開業無耐。「為兩餐乜都肯制前世」，「鬼馬雙星綽頭勁」，我哼著這幾句歌詞。然而，迎接我的，卻是迷途迷途孤燕，未得歸家的小孤燕...Any肥～～店子的佈置，一如想像的扮懷舊，迎合我這類老鬼客。 晚市只得車仔麵，但下午茶時段，更有鬼馬菠蘿包、沙嗲牛肉包，以及豬扒包等供應。 劃了三個餸，分別是豬紅、大腸，同埋溏心蛋，麵底我選了油麵。未幾，我的麵送上，面頭大堆的沙嗲醬，幾香，起勢咁撈勻再吃。豬紅唔怕一夾就散，亦無異味，過關。起初對這類店子的溏心蛋，沒太大期望，但佢又做得出流心喎。 我最關心的，始終是豬大腸，鹵得入味，中芯有點肥脂，蠻不錯。 杯凍鴛鴦有驚喜，濃滑也帶啡香，好！ 臨走時，正播放著...... 有條龍吒叱半個夜空可幫你成功...是真的嗎？