北角四眼妹美食屋 (已結業)

禮拜日晏晝喺炮台山有啲肚餓，行過見到有間賣魚蛋，就試一試。老闆娘超級細心，所有雞蛋餅同格仔餅都係即叫即整，粉漿都係即場混合味道。而且招呼周到，非常有禮貌。店舖前邊仲有兩張等，等到攰可以坐下。首先講下咖喱魚蛋。價錢非常合理，以魚蛋嘅份量同每一粒嘅大小合理。味道方面，咖喱味濃，辣到適中，唔會完全冇辣味。魚蛋質地彈牙，係有質素嘅魚蛋。除咗魚蛋，麻辣牛丸同墨魚丸都係一個唔錯嘅選擇。麻辣醬唔會過鹹，味道適中。牛丸多汁鮮嫩，味精唔太重，容易入口，配合麻辣醬更加惹味。而墨魚丸入邊有墨魚粒，非常有口感，而且有墨魚嘅鮮甜。最後當然唔少得甜品，朱古力雞蛋仔配抹茶餡。雞蛋仔甜度適中而且朱古力味突出。老闆使用嘅抹茶餡料係無糖抹茶粉，所以咬落去嘅時候會有濃郁嘅抹茶味以及苦澀味，如果各位係抹茶控，一定要試。口感方面，雞蛋仔外脆內軟，因為係即叫即整，所以非常新鮮。整體而言，價錢適中，味道不錯，係醫肚嘅佳選。