糖百府 (已結業)

成日都想識吓棉花冰, 終於有機會喇!睇OpenRice介紹,'糖百府'都好似係不錯之選, 一於就將第一次奉獻俾佢啦!估唔到閒日下晝六點幾, 小小嘅店裡面已經差唔多坐滿, 好彩我同我個同事兩個人都唔洗等位.我同事二話不說就點咗佢最鍾意嘅牛奶冰,仲加埋練奶,香蕉,杏仁片,焦糖布丁粒.我就點咗遽聞係佢地嘅招牌菜綠茶冰,再加練奶,香蕉,粟米片,朱古力魔豆.同事個牛奶冰先到, 嘩, 白雪雪, 好靚呀! 試啖先...真係好似棉花呀! 軟棉棉, 入口即溶, 仲好香奶味, 正!至於d杏仁片都好香, 焦糖布丁粒又好焦糖, 唯一敗筆在於香蕉太生!我個綠茶冰終於登場, 都好靚呀!不過食落, 始終覺得綠茶冰有冰感, 唔似得牛奶冰咁似棉花, 但茶味够, 夏天食可能會比較解渴!令我驚喜嘅係粟米片, 估唔到平平無奇嘅粟米片, 加咗落d冰度會出奇地夾!另一驚喜係朱古力魔豆, 第一次食差d爆漿噴落同事塊面度,好得意, 朱古力糖漿有濃濃嘅朱古力香, 只係略嫌甜咗少少.唯一美中不足都係香蕉唔够熟!整體嚟講都好好味! 夏天熱死辣辣, 食番碗冰的確...爽!