La Moo Moo' s Steak and Fries (已改名) 查看

最近真係好有食神，特別係食一啲高質素嘅牛扒。今晚就嚟咗灣仔軒尼詩道一間喺樓上18樓嘅扒房，地方細細，佈置高雅浪漫。我哋一人叫咗一個晚餐，第一個驚喜就係餐包。餐包配有肉桂牛油，因為我非常鍾意肉桂，呢度嘅肉桂做得好好，可以將平凡嘅麵包變得不平凡。香港好少會用到玉桂搽麵包，所以覺得非常滋味同埋驚喜。然後餐湯同埋沙律都非常之高質素，特別鍾意凱撒沙律加咗半熟蛋。我哋一人叫咗一個main course，試咗signature肉眼扒，同埋黑松露cream pasta。心型嘅肉眼扒，一出現已經令人心動，入口即溶，特別係肥膏嗰部份，係感官嘅享受。而黑松露意粉亦做得非常之出色，黑松露香濃，意粉嘅texture亦非常豐富。餐廳嘅薯條，揸得啱啱好，夠乾身，最重要係，薯條係free flow，食到你夠為止。