Saravanaa Bhavan (已搬遷) 新店位置

今日收工朋友仔話帶我去食印度咖哩，之前有食過都唔錯但都有少少香港口味，朋友話依間好正宗，去到餐廳大部分客人都係印度人，而且依間餐廳係素食，岩晒夏天熱冇咩胃口。我地要左一份芝士咖哩、蔬菜班戟、茴香黃飯、燒薄餅同薯仔咖哩角。薯仔咖哩角之前有食過係我鐘意嘅味道，依間都好食好香咖哩味外皮酥脆，但食多兩三啖就覺得好辣，唔食得辣真係會中招。蔬菜班戟好特別，醬汁好似菠菜泥再加洋蔥蕃茄清新得黎充滿印度風味，有四個唔同嘅醬汁，有一個係有洋蔥辣椒粒酸酸辣辣配班戟一齊食好夾。芝士咖哩好香，辣味唔算辣，一般人都可以接受到，芝士好特別一粒粒，同咖哩一齊食會冇甘辣，煙韌嘅燒餅吸滿咖哩，燒餅點咖哩食超好味。最驚喜係茴香黃飯，粒粒飽滿分明，啖啖清香，撈咖哩一流。我地原本以為食物會好重香料味，食岩岩好，而且菜式好多，下次可以再去。