龍門冰室 (已結業)

今日7點幾黎到已經排曬長龍啦！不過都唔係等左好耐就有得入座。呢到好多選擇！簡左一陣先諗到食咩好！最抵食應該係精選套餐，仲有成13 款簡，我叫左個鐵板龍門三扒，有豬、牛、雞，汁就簡左黑椒。呢款套餐仲送多士、餐湯。不過餐湯只有一款，係蕃茄湯。呢個餐都幾飽，三塊扒都好大塊，黑椒汁偏濃味，撈埋白飯食就岩岩好！另外叫左個忌廉汁煙三文魚意大利飯，望落平平無奇，但食落有驚奇，飯完全吸收曬忌廉汁既味，雖然望落以為冇乜三文魚，但原來放左係底！叫左個香煎豬扒拼紐倫堡腸跟韓式鐵鍋珍珠飯，呢個餐就配燒汁，個汁冇過咸，而且又係大大份，呢個配埋泡菜，酸酸辣辣幾開胃！野飲方面最有特色應該係奶茶紅豆冰，幾時都話冰室的奶茶底最出色，夠茶味！