鶴亀 (已結業)

成日都會經過呢間嘅門口，店舖門口唔係玻璃門設計，行過又望唔到裡面嘅環境；而且每次都唔啱食飯時間。今晚想食拉麵，上open rice望吓有無人post過環境相先。相片睇落環境都幾舒服，今晚一於去試試。今晚2個人，我地點咗櫻花蝦拉麵＋特濃豚骨沾麵；加點咗個日式煎餃子。櫻花蝦拉麵：麵係可以選擇個人要嘅軟硬度，呢度嘅拉麵係用幼麵。湯麵送到成碗滿滿嘅櫻花蝦，賣相好吸引。第一啖一定係試個湯先啦，佢係屬於清爽類型；湯唔會好咸但豬骨味好夠。搭配埋較濃味嘅糖心蛋，好平衡。叉燒切薄片，唔柴而且油香夠；一啖食落唔會感覺好肥膩。特濃豚骨沾麵：同拉麵唔同，沾麵用嘅係粗麵；一樣可以簡麵嘅軟硬度。湯味濃郁但時間耐咗，湯無嘢保温略嫌凍咗無咁好。日式煎餃子：皮是脆的，唔使額外沾醬料都好夠味。整體環境舒服，價錢算合理味道亦都唔錯；下次可以再試其它口味。