川味辣蟹·串燒·烤魚·雞煲·專門店 (已結業)

今日去尖沙咀探個朋友，由於大家太耐無見，所以一坐低就雞啄唔斷，足足傾咗一個下晝，搞到連買餸都唔記。友人提議我去金巴利道新開嗰間「川味辣蟹·串燒·雞煲·烤魚專門店」買外賣回家。原來朋友早前幫襯過，覺得店舖嘅雞煲同串燒都好好食，所以推介我試下。去到表明來意話嚟買外賣，店員即刻遞上餐牌讓我慢慢揀。食物嘅款式真係幾多，由烤魚、雞煲、磯燒海鮮，以至串燒、辣蟹、川味小炒，幾乎包羅萬有。單係雞煲就已經有 5 款可供選擇，另外仲有比較少見嘅麻辣田雞煲。我揀咗個藥膳雞煲，另外再加咗幾款餐前小食同串燒。藥膳雞煲 ($168)：個雞煲真係好足料，一打開蓋便即時傳來陣陣藥材香氣。撈起一看，除了半隻雞外，盒內還有不少芹菜、淮山、桂圓和紅棗。湯底由多款藥膳熬製而成，藥材味好突出，可以直接當湯水飲用。雞件分量十足，而且件件都好厚肉，肉質嫩滑，入口帶淡淡藥材味，食完真係成身暖笠笠。至於串燒同餐前小食就揀咗：燒魷魚鬚 ($20)、川式皮蛋同川味手撕雞。魷魚鬚有四大條，食落爽口煙韌，沾燒汁吃，更加惹味！另外個川式皮蛋 ($30)  同川味手撕雞 ($48)  亦很得我心。皮蛋晶瑩流心，入口外爽內嫩，伴著紅油吃，加倍刺激。