經過呢間小小嘅小食店
真係唔覺意行快啲好容易就走漏眼
難得仲見到呢種買少見少嘅小店，
又正好有少少餓，就決定試吓幫襯
成間店面積唔大，牆身可用嘅面積幾乎都貼滿menu
有各種常見嘅地道街頭小吃，琳瑯滿目
不過今次我好快就揸定主意，
因為我最鍾意嘅小食係雞蛋仔，
又見佢寫住即叫即整，仲大大粒字標明「脆卜卜」
一於扑鎚
Order後，店員即刻開始落手製作
喺模具上搽油、倒蛋漿、闔模、反模，
所有步驟都好純熟，有板有眼
眨眼間，雞蛋仔就脫模出世
正式奉客前，店員仲會將雞蛋仔曲起造型，
再放喺小風扇前快速降溫一陣
到拎到雞蛋仔時，仲係暖暖哋
宜家天氣涼涼哋，啱晒~
唔太熱嘅溫度，可以馬上郁手搣嚟食
入口一咬，隨即發出「咔咯」聲
貨真價實，的確好脆！
而內裡質感好鬆軟，食落仲幾有蛋香~
今時今日，$12買得到一底質素唔錯嘅雞蛋仔，
算係物有所值啦
住附近嘅朋友 / 附近返學嘅學生哥，
需要醫肚時，不妨一試啊！
