好運印尼餐廳

營業中

休息中

母親大人知我今日出左黎觀塘，佢話好懷念我細個時候同我一齊食既黃錦飯，叫我買盒番黎食，但點知已經執左， 附近我所知有一間米芝蓮印尼菜餐廳，於是買左幾盒外賣番屋企食，順便盡下孝道。我媽係印尼華僑煮得一手好食既印尼菜，舅父亦係印尼開印尼菜店，對於印尼菜我地一家可謂有一定既要求。結果阿媽比呢盒飯唔合格，飯雖軟熟，但椰汁同黃薑味薄弱，呢個我都認同，因為我都食到冇咩味。雞蛋亦冇傳統既辣醬，青瓜係新鮮，但啲炸雞硬邦邦，似炸完又番炸。鹹魚仔花生亦冇甜豉油味道，正常應該仲有辣椒仔炒香。椰絲比較好少少，算幾有香味，撈下飯食係可以既。豆角同豆腐亦冇咖哩香氣，豆角偏軟身。總結黎講盒黃錦飯完全唔正宗，係迎合港人口味，份量少，唔抵食，仲要58蚊。其實街市印尼店賣既黃錦飯都只係20蚊，味道先係真正印尼風味，呢度以呢種魚目混珠水平而得到米芝蓮推介，我覺得唔太值，我會選擇番各區街市印尼店既黃錦飯，好味又平。