海皇粥店 (粉嶺名都商場) (已結業)

成日食茶餐廳早餐，感覺真是好膩，今日早咗返工，突然好想食粥，名都只有一間海皇粥店，去到地方光猛乾淨，搵個位坐低，由店員落單之後好快食物都上枱！南瓜粟米肉碎粥--碗粥好大碗，金黃色好靚，粥底都算滑，南瓜已經溶晒，有時會食到南瓜絲，食緊就有一粒粒粟米粒，大大粒好爽口！肉碎比較嚡同大粒！所以我都無食，如果係無肉碎清粥仲好！份量大，我只係食到2/3！好滿足！炸両--新鮮做起，因為開放式廚房見到店員包，因為呢間油炸鬼唔會放得耐，夠新鮮，腸粉皮雖然唔算好滑，但包住外脆內軟嘅油炸鬼都好好味，配甜辣醬一齊食，絕配！欣賞係豉油另上，可以由食客決定落幾多！幾窩心！調味料全部放在枱上任用！放得乾淨企理！店員勤快爽手！上菜好快！講真星期日無套餐，價錢算貴，但可以坐得舒服食一餐粥！海皇真係首選，因為好多舊式粥店味道唔錯，但地方真係趕客，殘舊之外，枱櫈都油淋淋！唔會想坐得耐！所以貴啲都會選呢度！