一入門口就見到個好靚嘅月亮，打卡一流，仲有綿羊雲伴住個月亮，真係夠晒心思。
入到去原來地方好大，漫天星星佈置得好有情調，未食都比個環境吸引左。每桌桌面仲放住唔同嘅發光枱燈，店主好有心思，好細心。原來仲見到有間大房，侍應話可以做party房，可以做主題佈置。個佈景好靚，粉紫紅色閃閃布做背景，真係靚爆打卡一流。
我地叫左2人餐，選左龍蝦湯同生蝦，主食揀左軟殼蟹海膽意大利飯同慢煮豬斧頭扒。
🦞龍蝦湯好有龍蝦味，仲有啲蝦肉係入面，唔係得啖湯。
🦐泰式生蝦好新鮮，咬落彈牙。
🐷個豬係慢煮嘅，唔會鞋颯颯咁，好有肉汁，有豬味。
🍚軟殼蟹海膽意大利飯，正宗意大利飯口感，咬落有口感，彈口，用返正宗意大利飯煮，唔係用珍珠米扮。（其實落單時都有問我哋要正宗定軟身啲，話怕好多人都食唔慣）軟殼蟹即叫即炸，好脆又唔油。海膽唔會有唔新鮮嘅海膽味，個味好濃，足晒料。
最後有包甜品🍮我地自己升級左食Croffle 甜品，好脆好夠牛油香，配搭上新鮮strawberry 同藍莓🫐，真係大滿足👍🏻
套餐仲跟餐酒，咁嘅質素咁嘅環境真係物有所值。
餐廳內嘅侍應都好有禮貌，後生仔，好有熱誠。比個讚佢地！
下次會再黎食，希望有新驚喜啦！
