舖頭位置真係麻麻，唔係攞住個地址真係唔會搵到嚟呢度
主辦單位好細心，個個都有名牌架~
主角出場
香噴噴嘅雞煲，辣度溫和，唔太食辣嘅朋友都可以食到
唔知係咪人多又肚餓嘅關係，一瞬間就冇晒啲雞嚕...
冇晒雞就係時候加湯打邊爐嘞
老闆話最好加辣湯，加清湯冇咁好味喎
自家炸響鈴─新鮮炸出嚟，好鬆，但唔係好脆，幾好味
野生竹笙皇─真係未見過咁大"枝"...夠晒索湯，正
桂花蚌+珊瑚蚌─正常火鍋料啦，幾新鮮
花雕醉雞翼─好得意呀呢個，退左半條骨出嚟，食既時候好鬼方便喎
不過醉雞配辣雞湯，好似唔係太夾咁
陸陸六寶丸─唔知係咪陸陸雞煲所以要陸寶丸呢?所有風頭都比粒黑蚊蚊嘅墨魚丸搶晒
墨汁味唔算太突出，但就有一種強烈嘅海鮮味，比原味嘅白色墨魚丸好味得多呀!
陸陸手切肥牛、頂級肩胛肥牛
牛肉有兩種，牛頸脊同埋牛胸排，頸脊就肉味豐富，口感軟唸得嚟又唔韌喎
牛胸排呢，就肉味無咁重，但有啲油脂香味，兩個都咁正!
手打墨魚滑─太極咁好得意，味道同墨魚丸基本上係一樣
我諗呢餐最特別係個墨汁黑魚滑同埋個牛胸排
可能出面冇得食嘅關係啦，主角雞煲都算不過不失
如果下次再食就幾大都叫辣啲，雞煲都係要辣先夠過癮!!
