源祖之味古早蛋糕店 (已結業)

古早味蛋糕喺香港都hit咗一排，我食過既店舖都唔少。最近有朋友極力推薦我試埋將軍澳嘅源祖之味，話佢食過咁多間，覺得呢間最好味，搞到我都好好奇，特登去試下係咪真係咁正。星期日去到，見到舖頭前面堆咗好多人， 好受歡迎。見到有期間限定嘅迷人甜蜜玫瑰味（$85，仲要係星期六日先有， 難得遇上一定要試下。另外仲揀咗個囡囡最愛嘅海苔香口肉鬆味（$75）。玫瑰味蛋糕上有好多粉紅色嘅玫瑰花瓣 ，好浪漫。食落有濃郁嘅玫瑰香味，味道天然，唔係香精。蛋糕口感綿密，帶少少濕潤。肉鬆味都好足料，面頭舖滿肉鬆，蛋糕中間仲有一層肉鬆，蛋糕充滿蛋香。👍👍