泰潮 (嘉咸街) (已結業)

我見健康食品拉麵多人排，就行左去咗呢間泰潮。未試過，就試吓佢。一入門口,見到佢個出菜出緊碟香茅豬扒飯，豬扒上覆蓋住一層立立令嘅啡色芡汁，個心當堂打個突。入到去，見到十枱有九枱食海南雞, 我唔信邪，叫咗個泰式豬手飯。 結果，悔不當初。豬手肥到核爆，完全無鹵水味，有幾片豬大腸同半隻蛋，最難頂係飯面頭果一大pat深色芡汁，疑似係香茅豬扒同一pat芡汁。點解泰國野會有芡汁? 仲要係一pat都唔知係咩味嘅芡汁！到底我食緊啲乜嘢？！唔通呢度淨係得海南雞食得？咁你唔好賣其他野嘛！好辛苦食左一半，頂唔順放棄。杯泰式檸茶，用的不是泰式青檸，味道又是怪怪，飲兩啖就棄左。仲有個椰汁糕甜品我都無食。呢個set要$80。唔好講中環唔中環，唔好講米唔米芝連，你收人$80俾呢D質素人食, 有冇搞錯？！你好意思嘅？！$80，我去你對面間日本野夠食碗好食你一千倍的拉麵了！好奇怪的係，我見食評大多數都係激讚，就算批評都好留手，用詞好克制，只係話味道「令人失望」。係我唔啱，我食左又貴又難食嘅嘢總是特別激動。呢間野，永遠唔會有下一次。