小泰閣 (已結業)

係九龍灣區返工既朋友，唔知你地有冇行經宏照道發現到呢間打正旗號專賣泰國雞既小店？之前有同事講開呢度轉左手開左間新既泰式野，仲試過話味道不俗，咁當然咪執輸搵次跟埋佢去買。舖面唔算特別大間，可能主要以外帶為主，係等候取餐既幾分鐘內都見唔少人黎幫襯。先講返個MENU先，除左招牌雞之外，仲有其他系列譬如泰式雞絲，冬蔭公，青或白咖喱，酸辣撈，特盛及船河之類，價錢由34起到45不等，跟餐包是日飲品一杯。招牌雞飯，皮薄嫩滑，雞油飯就夠硬身煙韌但入口略嫌唔夠油香，可以有改進空間咁多樣選擇之中，特別鍾意佢地既冬蔭公雞湯河。一來酸酸辣辣就最岩自己口味同埋會幾開胃，份量OK唔會湯多過粉，雞肉鮮嫩白滑。湯底都幾濃郁，數得出既草菇、洋蒽、香茅、南薑、香葉、蒜頭、指天椒、冬蔭功辣醬都齊晒。揭開蓋後，一陣又一陣既香辣氣味迎面撲鼻，真係難以抗拒。趁熱咬一啖雞肉再加一口辣辣地既湯，感覺非常暖胃之餘，即刻精神晒!唔太鍾意刺激口味既都仲有好多選擇，我都有試過佢地既招牌雞湯河，不過講到惹味方面當然比唔上冬蔭公正，總言價錢同份量算係合理，不妨一試