船皇 (厚福街) (已結業)

星期五晚餐黎到尖沙咀食泰式船麵，係門口睇以為得好少位，但原來轉左彎都仲有位，另外有一個位介紹左餐廳既發展，原來2019先登陸香港～我揀左船麵小辣，原來麵類都有四款揀，我揀左金邊粉，配料方面因為我麻麻地豬潤，所以叫左佢走豬潤。個湯好濃，配料都好多，索哂湯汁。另外揀左個牛腩牛片牛丸撈蛋麵小辣，同樣都好足料，撈蛋麵就似平時雲吞撈麵既感覺，但多左額外既香料。再加左兩個小食，因為佢冇哂春卷同蝦餅，所以揀左雞翼，雞翼開左邊，每舊都係單骨，好香脆，比平時就咁煎雞翼更好食。仲有串魷魚鬚串泰式燒烤醬，燒得幾香，不過就要少少痴住支串，食起上黎就少少麻煩。但雞翼/串燒既價錢都吸引，所以如果一個麵食唔夠，可以叫少少串燒黎食。飲品揀左泰式奶茶同龍眼冰，放飲品個器皿好特別，我以為係甜品，唯一唔好就係飲緊時唔知仲有幾多就飲晒。