翟道翟棉棉冰 (已結業)

知道咗旺角中心開咗間賣芒果糯米飯綿綿冰嘅舖頭，聽講晌泰國好流行，加上自己又幾鍾意食芒果糯米飯，咁就去試吓先。同場內大部份食肆一樣，呢度都係外賣為主，舖位麻雀雖小但五臟俱全，亦睇得出店主花咗唔少心思去佈置。四十幾至五十幾蚊一份綿綿冰，算係合理。我試咗芒果糯米飯綿綿冰，由於係外賣性質，所以呢個綿綿冰嘅膠杯都好輕巧，我覺得個設計有少少似個火炬，拎住食都幾方便。上面放咗用芒果汁同椰奶打到細碎嘅綿綿冰，然後淋埋芒果汁、椰子忌廉同綠豆邊，賣相唔會比出面堂食嘅出品差。綿綿冰味道微甜清新，食到內層時仲有唔少菲律賓呂宋芒果粒同糯米飯，最底下就有威化脆脆。個杯睇落細細，內容量就一啲都唔少。除咗綿綿冰之外，佢哋都有提供唔少飲品，原本想飲貓山王，但見呢款綠帽奶昔個名好搞鬼，於是叫埋嚟試。問咗店員之後得知原來係用咗泰國一種常見嘅有色糖漿去整，成杯淺綠色咁，上面就唧咗鮮忌廉，就咁睇又幾吸引。甜度方面由於我怕太濃郁，所以要咗少甜，出嚟嘅味道有少少似果味，奶昔嘅質感又唔會過份濃稠，反而有少少沙冰嘅冰感，飲得舒服又唔黏喉，不過我就完全想像唔到佢同綠帽有乜關聯，哈哈。