Woods (已結業)

Woods好似就係旺角閙市中嘅森林，俾人一種可以喘息的感覺。餐廳中央放咗一棵樹，旁邊都有唔少木製裝飾，好原始好raw。今晚唔知點解叫嘅食物同飲品都有泰式風情，可能係身體賀爾蒙驅使，想食辣味。泰式青咖喱雞肉意粉有茄子冬菇雞肉，配料都幾豐富，意粉醬汁唔係好多，但都帶有少少青咖喱辣味。燒烤比目魚配上冬蔭公醬，配搭幾新奇，兩件比目魚皮脆肉滑，唔點汁都唔會寡口，比目魚下面有炒雜菇，旁邊再有焗椰菜花同沙律。冬蔭公醬用咗嚟送白飯，白飯稍硬，如果好似酒樓白飯又香又軟就perfect喇。青檸梳打青檸份量適中，有青檸清新酸味，梳打水冇落太多糖，比較健康。甜品叫咗芒果班戟分嚟食，班戟賣相好色彩繽紛，芒果粒同忌廉反傳統放喺面，上面尚有粟米片、朱古力餅碎同朱古力醬，見到都會覺得心花怒放。