泰一 (已結業)

返工返到倦，收工一定要食餐好，好好咁慰勞下自己。上次同朋友食完「 泰一 」之後，就一直好掛住呢度既泰式生蝦。生蝦好新鮮，肥大肉厚，個生蝦汁都係精華！！必食！原本諗住叫個麵包咖哩牛腩，但又怕眼闊肚窄食唔曬，怕浪費，因為要留肚食今晚既主菜 — 「 明 爐 烏 頭 」！！所以只好凈叫個咖哩牛腩啦，咖哩有 3 款揀 ：黃咖哩 / 青咖哩 / 馬沙文咖哩。 我就揀左唔太辣既黃咖哩，好香椰味 ，略帶少少甜，咖哩汁唔錯！牛腩大概有6、7 舊，大大舊但燜得好淋，入哂味，呢個時候真係好想加個麵包 / 薄餅，算啦，唯有下次吧！登登登登 ⋯ 終於到左今晚既主菜 — 「 明 爐 烏 頭 」啦 ！！ 真係好大盤， 除左大大條烏頭之外，重有好多配料，有菜、 金茹、雞肶菇、蔥、芫茜⋯所以就算個湯未滾起都已經好香，再加埋烏頭上面鋪上大量既粉絲，夠足料，正！個湯底越滾越惹味，唔駛滾好耐已經出哂味，酸酸味味，等條烏頭同粉絲浸多陣，索哂d 湯汁，熱辣辣咁食，真係無得頂！食完盤魚，真係飽到上心口！