輕鬆飲 (已結業)

睇見咁多食家對呢間食店嘅激讚, 師傅一定要去試一試, 但係至於幾時會去呢, 就從來都未決定! 直至昨日天氣十分炎熱, 師傅覺得如果能嘆一杯冰凍嘅珍珠奶茶會係一個唔錯嘅選擇, 所以就決定黎呢度買杯試一試! 未見食店, 先見條龍; 唔係恐龍, 而係人龍; 唔係王人龍, 係大排長龍! 平時師傅一定唔會排, 不過昨日就幾有癮, 排一排都無妨; 排左十分鐘到師傅先去到櫃台, 唔理咁多即刻柯打一杯大嘅波霸奶茶少冰少甜!再等幾分鐘一杯冰凍嘅波霸奶茶終於到手, 師傅二話不說即刻試一啖, 發覺奶茶好滑, 口感一流, 而茶味又夠香, 唔會太甜, 好得; 而珍珠又多又大又彈牙, 勁有咬口, 好正呀, 加上少冰都幾凍, 唔錯!總括黎講波霸奶茶真係好掂, 雖然地方細細但人流超多, 而賣飛嗰位哥仔好有禮貌, 縱使做到身水身汗, 依然笑容滿臉, 比師傅覺得佢好有"HEART", 價錢唔貴, 細杯八蚊, 大杯十蚊, 抵飲非常! 但師傅有樣野唔係好明, 就係點解會叫做波霸奶茶呢? 波霸唔係退左休咩? 如果下次經過而又唔使排隊, 師傅一定會再幫襯!