品越越式料理 (雅蘭中心)

旺角周圍都人擠人，但係就真係好方便，約朋友大家都鍾意喺雅蘭老地方等。已經第二次幫襯品越，一般店員服務都很好有笑容。而且我鍾意佢裝修有啲特色同埋座位夠晒闊落。每一次睇Menu都有新鮮嘅感覺，今次我一定要試吓招牌菜式 火焰燒春雞配秘製香橙酒 $188。限量供應㗎！製作需時請耐心等候！

用心做嘅食物真係要啲時間，原隻春雞上枱，由 經理 serve 我哋，經理好搞笑問我地準備好手機影相未？！

首先淋上香橙酒，然後點火，說時遲那時快火燃燒着春雞，然後有一陣香氣撲鼻。經理再幫我地切開隻雞，原來內藏玄機。燒春雞裏面有黃姜飯，飯吸收晒雞裏嘅精華，有雞油香味所以更加惹味。皮脆肉嫩又多汁，係我嘅好味推介！

就算普普通通一個馬拉盞炒芥蘭，辣得特別惹味，顏色翠綠，食落又唔會話好油膩。

峴港焗扇貝煮法有越南特色，外層金黃色嘅醬汁包裹着大大粒嘅帶子，厚厚實實，肥美多汁。

三色冰夠特別，顏色靚之餘又唔會太甜。

最後嘅香芒糯米飯，見到心心嘅外型，心都被溶化了，加上芒果夠晒甜，perfect ending 。