肥高美食 (已結業)

星期日路過佐敦，見佢新開張無幾耐，於是入去試下。我地5個人叫左好多野食：公仔麵餐($20)：呢個好抵，20蚊居然有3餸,，仲包野飲。可以選香腸、餐肉、煙肉、蛋、肉丁……都幾多選擇，質素唔錯。其中，沙爹牛肉同雪棻肉絲最好味。本來我地最初只叫一個，後來都忍唔住再order多個，因為真係仲抵過自己煮。沙拉骨($48)：見到有檯外國客讚好味，猛話「very good」，於是叫來試下。真係幾好食，個汁好特別，聽到老闆講用「mango」做汁。呢個幾正。水餃($18)：水餃好自家風味，個湯底係白色的，店主話係自己餚豬骨湯，無味精，當堂覺得店家好有誠意。糯米飯($15)：係蒸糯米飯，比一般炒的軟熟。我本身唔太喜歡食糯米飯，但都覺得呢個好味。碗仔翅($15)：入口比較杰身，有肉絲、木耳，但無粉絲的，唔似一般食開的碗仔翅。友人覺得奇怪問老闆。老闆話佢地唔同一般做法，係用魚唇代替。嘩！十五蚊有魚唇食，又幾抵。鹵水鴨舌、乳鴿：鴨舌肥美，乳鴿肉質好嫩。但個人覺得個汁可再濃味ｄ，如果鹵得入味ｄ會更加好食。5個人食左二百幾蚊。總括來說，幾好食同幾抵食，有下次。