香港達人 (卓爾廣場) (已結業)

迎月夜去探親戚，食埋晚餐先走，卓爾居呢個星期已經第三次，唔想諗食咩交俾佢哋諗，跟住尾走入香港達人。餐廳坐位及環境不錯，窗邊卡位已經坐滿人。3個人無咩飯癮，叫咗蠔仔肉碎泡飯、羅漢齋扒西蘭花上素、魚香茄子肉碎煲。蠔仔肉碎泡飯，鮮味蠔仔飽滿漲卜卜，可惜有幾隻爆咗肚，視覺上要扣些少分，湯飯內加入薑絲、蔥粒和芹菜粒辟鯹，又有微量生菜絲增加口感，另有冬菜粒提味，大家一致認為好吃。羅漢齋扒西蘭花上素，西蘭花青綠爽口無調味，許是烚的時候沒放鹽，食材似乎是獨立準備，整體味道來自獻汁，淡口味之選。魚香茄子肉碎煲，煙飄飄熱辣辣地上桌，聽到吱吱喳喳的聲音，令人食欲也增加…笑油泡過的茄子保留住美美的紫色，與肉碎混在一起，還有一點紅椒、一些紅蘿蔔條，面頭鋪了一把綠芫茜，顏色賣相很吸引。聞著香噴噴茄子味，入口食味咸淡適中，吃不出咸魚的味道，也看不見它的蹤影，不過撈飯都好食， 唔錯。