中心點

營業中

休息中

疫情之下，百業蕭條。二人限聚令之下，99.9%嘅酒樓都無奈選擇停業。鍾意飲茶唔係老人家專利，我呢個90頭都好鍾意飲茶🥺本身想去嘅茶樓同點心舖冇開，唯有打去最近嘅中心點問下，竟然有開🥺$88有個籠仔荷葉蒸飯+油菜+燉湯，都算抵呀! 另外嗌左平時一定食嘅點心，價錢同酒樓相約，但係味道比酒樓好👍👍👍👍👍嗰日係星期六，坐唔滿客人，啲點心齊哂食哂咁滯個蒸飯先到，趕時間嘅人唔好嗌呢個set🙈個人覺得幾樣點心入面，鳳爪係最出色! 平時去酒樓食，一係就個汁太濃味，一係就啲雞腳皮溶溶爛爛咁。呢間竟然攞得到個平衡，唔會越食越嗌咸👍灌湯餃唔係鳳城嗰啲傳統灌湯餃，係一般嘅湯浸餃，想食傳統嘅就唔洗考慮😂蒸飯唔係一人份量，除非你係小林尊。啲雞嘅份量好慷慨，唔會執啲雞骨比你就算，肉多多，份量都多多🤤最唔鍾意係個金錢肚，好大浸牛雜味😫 可能呢啲先叫正宗? 酒樓食嗰啲完全冇牛雜味，所以都幾鍾意叫金錢肚，我本身唔食牛雜🤢環境ok，光猛又乾淨。係有個侍應態度麻麻地，啲點心係凌空dum落枱面，我又冇得罪你，唔洗咁樣dum野掛😑 啲野多到冇乜位擺都是但放上枱，正常侍應都會推一推啲碟擺好啲😑